haraad inaad dareentiyo kulayl hinif ah mooyaane

halakaadkan maad mudan intaad hira ku noolayde

hadii aad halkii joogi layd hooyo talinaysey

ama aad hangoolkii ka baqi hanad walaalkaa ah

oo aanad hayhaato iman maad hawiranteenoo

hilin uumiyuhu ay maraan hugga ma siibteenoo

hadh cad kuma godleen wiil yaroon heetis kaa bixinoo

hilbahaaga uma qaawiseen gaal hariiryo leh oo

horaadada ma tuujeen midaan geyin hibaaqaas oo

habaar qabe kolaba meel cidla ah kuguma haysteene.

haydaaro way dhici jirtaye waxa habaar weyn ah
oon hore u soo marin arliga haybna lagu sheegin
duul aharaga sare kuu egoo hoosta ka cadaan ah
oo aanu hadalkaagu solin baa hadeer kacayoo
hidahaan lahayn iyo xishood gabay halkiisiiye
inanyahay halowga aad tahee halis u daaqayso
hawadaa ku lumisiyo ku dayo hebel afcaashiisa
hindisaha asqoobiyo talada noqotey heehaabka
waxa maanta kuu heer aheed hadiyad moodayso
beritood is haaraanto iyo hiifid baa xigiyoo
waa lagu hungoobaa jidkaad haatan maraysaane.

hasaasahaan arkaayiyo sidaad heec u tahay liita
ee laguu hantiyey qaran jaboo hoogey baa dhalaye
wallee ama halowdoo dhamaan haadku idin eegey
ama hooygii loo noqoy dhib waa laga hayaamaaye??